„პუბლიკის” ჟურნალისტი ალექსანდრე ქეშელაშვილი თბილისის საქალაქო სასამართლოს მოსამართლე ნინო ენუქიძემ პოლიციისადმი დაუმორჩილებლობის მუხლით სამართალდამრღვევად ცნო და სიტყვიერი შენიშვნა გამოუცხადა. წვრილმანი ხულიგნობის ნაწილში მან საქმის წარმოება შეწყვიტა. ამ ორი მუხლით ედავებოდა შსს 29 ნოემბერს, ღამით დაკავებულ და ნაცემ ჟურნალისტს.ალექსანდრე ქეშელაშვილის დაკავების ოქმი 29 ნოემბრის 01:55 საათზეა შედგენილი.საუბარია 28 ნოემბრის ღამეს განვითარებულ მოვლენებზე, პროტესტზე, რომელზეც ხალხი სპონტანურად შეიკრიბა „ქართული ოცნების“ გადაწყვეტილების საპასუხოდ. იმ დღეს პრემიერ-მინისტრმა ირაკლი კობახიძემ თქვა:„მივიღეთ გადაწყვეტილება, 2028 წლის ბოლომდე დღის წესრიგში არ დავაყენოთ ევროკავშირთან მოლაპარაკების გახსნის საკითხი“.რეპორტიორი სანდრო ქეშელაშვილი საპროტესტო აქციას აშუქებდა, რა დროსაც ნიღბიანებმა დააკავეს და სასტიკად სცემეს. პოლიციის განყოფილებაში გადაყვანის შემდეგ მას უთხრეს, რომ დაკავებულია სამართალდარღვევისთვის.ჟურნალისტი იმ დღეს საბოლოოდ საავადმყოფოში მოხვდა - გატეხილი ცხვირით, რომელზეც ოპერაცია გაუკეთეს. ჟურნალისტზე ძალადობის საქმეზე გამოძიება დაიწყო სპეციალურმა საგამოძიებო სამსახურმა. დამნაშავე ნაპოვნი არაა. ჟურნალისტს დაზარალებულის სტატუსი აქვს. სპეციალურმა საგამოძიებო სამსახურმა დაასკვნა, რომ მას ჟურნალისტურ საქმიანობაში შეუშალეს ხელი.ბრალდებამ სასამართლო პროცესზე ორი მოწმე გამოიძახა. ორივე პოლიციელი - 27 წლის თამაზ თავაძე და 23 წლის გიგი ბობოხიძე. მათ თქვეს, რომ ჭიჭინაძის ქუჩაზე პოლიციელების რამდენიმემწკრივიანი კორდონის უკან იდგნენ. მათ გაიგონეს და დაინახეს, როგორ იგინებოდა ჟურნალისტი სხვებთან ერთად და ცდილობდა სპეცრაზმელთა რიგის გარღვევას.პოლიციელების სასამართლოში ბევრი ერთმანეთისგან შეუსაბამო რამ თქვეს და ფაქტებიც დაამახინჯეს.პირველი - მათ დაინახეს, როგორ იგინებოდა ჟურნალისტი და ცდილობდა სპეცრაზმელთა რიგის გარღვევას. თამაზ თავაძის თქმით, ახსოვს, როგორ გამოიყურებოდა დაკავებული - „წვერი ჰქონდაო“. გიგი ბობოხიძემ კი ტუჩების მოძრაობით დაასკვნა, რომ ჟურნალისტი იგინებოდა.სინამდვილეში, ალექსანდრე ქეშელაშვილს დაკავების მომენტში თავზე ჩაფხუტი ეხურა და აირწინაღი ეკეთა, ანუ სახე არ უჩანდა. ეს გამოჩნდა დაცვის მხარის მიერ წარდგენილ ვიდეო- და ფოტომასალებშიც.მეორე - შსს-ს სასამართლოსთვის ვიდეოები არ წარუდგენია, უწყების წარმომადგენლებმა თქვეს, რომ სამხრე კამერები ალექსანდრე ქეშელაშვილის დაკავებისას დამჯდარი იყო. პოლიციელებმა კი მოსამართლეს უთხრეს, იმ მომენტში სამხრე კამერები საერთოდ არ გვქონიაო: „აქციების დროს გვიტყდება და გვეკარგებაო“.მესამე - პოლიციელმა გიგი ბობოხიძემ თავდაპირველად თქვა, რომ იცოდა ალექსანდრე ქეშელაშვილის პროფესიის შესახებ. „ვინაიდან ჟურნალისტია, წინა მხარეს ...