უკრაინის ომის, ახლო აღმოსავლეთში ვითარებისა და სხვა საკითხების გარდა, 17 მარტს ბრიუსელში, ევროკავშირის საგარეო საქმეთა მინისტრების შეხვედრაზე, სავარაუდოდ, იმსჯელებენ რადიო თავისუფალი ევროპა/რადიო თავისუფლებისათვის (რთე/რთ) აშშ-ის კონგრესის მიერ დამტკიცებული გრანტის მოქმედების შეწყვეტის თაობაზე. ამის შესახებ რადიო თავისუფლების კორესპონდენტი იტყობინება.მედიაორგანიზაციის შტაბ-ბინა პრაღაში მდებარეობს. ჩეხეთის საგარეო საქმეთა მინისტრმა იან ლიპავსკიმ კვირას ილაპარაკა, რამდენად მნიშვნელოვანია რადიო თავისუფალი ევროპა/რადიო თავისუფლებისა და „ამერიკის ხმის“ მუშაობა და მათ უწოდა „შუქურა“ ავტორიტარული მმართველობის პირობებში მცხოვრები ადამიანებისთვის. ჩეხეთის რესპუბლიკის წარმომადგენლებმა ევროკავშირში კოლეგებს შორის გაავრცელეს განცხადების პროექტი (ის რადიო თავისუფლების განკარგულებაშია), რომელშიც გამოხატულია სერიოზული შეშფოთება რთე/რთ-ის დაფინანსებასთან დაკავშირებული სიტუაციის გამო. მასში ნათქვამია, რომ მედიაორგანიზაცია, რომელიც ათწლეულების მანძილზე აწვდიდა ობიექტურ ინფორმაციას რკინის ფარდის მიღმა მყოფ ადამიანებს, „აგრძელებს სანდო, დამოუკიდებელი ამბების მიწოდებას ათობით მილიონი ადამიანისთვის რეგიონებში, სადაც თავისუფალი პრესა არ არსებობს ან შეზღუდვებით მოქმედებს“. აღნიშნულია, რომ რთე/რთ თავისი საქმიანობით აძლიერებს ევროპის უსაფრთხოებას და მისი მუშაობის შესაძლო შეწყვეტა „საჩუქარი იქნება ევროპის მოწინააღმდეგეებისთვის“.პროექტში გამოხატულია განზრახვა, მოძიებულ იქნეს სახსრები, რომლებიც საშუალებას მისცემს რთე/რთ-ს, გააგრძელოს თავისი საქმიანობა. დეტალები არ არის მოცემული. გაურკვეველია, ევროკავშირის რამდენი ქვეყანა შეიძლება შეუერთდეს ამ განცხადებას.ბევრი ამერიკული და საერთაშორისო ჟურნალისტური ორგანიზაცია, მათ შორის ეროვნული პრესკლუბი, „რეპორტიორები უსაზღვრებოდ“ და ჟურნალისტთა დაცვის კომიტეტი, გამოვიდა რთე/რთ-ისა და „ამერიკის ხმის“ დასაცავად.14 მარტს აშშ-ის პრეზიდენტმა დონალდ ტრამპმა ხელი მოაწერა აღმასრულებელ ბრძანებას შვიდი ფედერალური სააგენტოს, მათ შორის აშშ-ის გლობალური მედიის სააგენტოს (USAGM) შემცირების შესახებ. USAGM მეთვალყურეობს მედიაკორპორაცია რადიო თავისუფალი ევროპა/რადიო თავისუფლება-ს, „ამერიკის ხმასა“ და ზოგიერთ სხვა მედიასაშუალებას.განკარგულების გამოქვეყნებიდან რამდენიმე საათის შემდეგ მედიაში გამოჩნდა USAGM-ის წერილი, რომელშიც ნათქვამია, რომ წყდება რთე/რთ-ის დამფინანსებელი აშშ-ის კონგრესის მიერ დამტკიცებული გრანტი. წერილს ხელს აწერს კერი ლეიკი, რომლის თანამდებობად მითითებულია „USAGM-ის უფროსი მრჩეველი, აღმასრულებელი დირექტორის მოვალეობის შემსრულებელი“. ასევე ცნობილი გახდა, რომ „ამერიკის ხმამ“ ფაქტობრივად შეაჩერა მუშაობა მას შემდეგ, რაც მისი თანამშრომლების უმეტესობა ...