საფრანგეთის რამდენიმე ბეჭდურ გამოცემასთან ინტერვიუში ემანუელ მაკრონმა ასევე თქვა, რომ ნებისმიერი ასეთი ძალა დაკომპლექტებული იქნება "თითო ქვეყნის რამდენიმე ათასი სამხედროსგან", და მათი დისლოცირება რამდენიმე ადგილას განხორციელდება. მაკრონის თქმით, ამასთან დაკავშირებით ინტერესი რამდენიმე ქვეყანამ გამოხატა, ევროპაშიც და მის გარეთაც."უკრაინა სუვერენულია. თუ ის ითხოვს მოკავშირე ძალების მის ტერიტორიაზე ყოფნას, ეს არაა რაღაც, რასაც რუსეთი უნდა დათანხმდეს ან უარყოს", - ამბობს მაკრონი 15 მარტს, გვიან საღამოს გამოქვეყნებულ ინტერვიუში.მაკრონის განცხადებების ფონია ევროპელი ლიდერების ძალისხმევა, გამოიკვეთოს შესაძლო სამომავლო სამშვიდობო მისიის კონტურები.საუდის არაბეთში გამართული მოლაპარაკების შემდეგ, უკრაინის და აშშ-ის ოფიციალურმა პირებმა 11 მარტს გამოაცხადეს, რომ კიევი დათანხმდა ცეცხლის 30-დღიან შეწყვეტას, რუსეთის მხრიდან თანხმობის პირობით.მოსკოვი ჯერჯერობით ამ წინადადებას გულგრილად ეკიდება. პრეზიდენტი ვლადიმირ პუტინი აყენებს დამატებით პირობებს, კიევისთვის აშშ-ის იარაღის მიწოდების შეწყვეტის ჩათვლით.პუტინი ასევე ამბობს, რომ განხილული უნდა იყოს სამომავლო ვითარება რუსეთის კურსკის რეგიონში - სადაც ბოლო კვირებში უკრაინის ძალები პოზიციებს კარგავენ. უკრაინის ძალები კურსკში მოულოდნელად აგვისტოში შევიდნენ.რუსეთს ნათქვამი აქვს, რომ ნატოს ძალების განთავსება მისთვის მიუღებელი იქნება.გასული ღამის განმავლობაში რუსეთმაც და უკრაინამაც ერთმანეთის საწინააღმდეგოდ დრონებით და რაკეტებით განახორციელეს დარტყმები, ხოლო ბრძოლის ველზე რუსეთის სამხედროები განაგრძობდნენ ძალისხმევას კურსკის რეგიონიდან უკრაინის ძალების განდევნის მიზნით.სულ მცირე სამი ადამიანი დაიჭრა რუსეთის სასაზღვრო რეგიონ ბელგოროდში, როცა უკრაინის დრონები მოხვდა ქალაქ გუბკინში მდებარე სახლს - ამბობს რეგიონის გუბერნატორი, ვიაჩესლავ გლადკოვი.ვორონეჟის გუბერნატორი, ალექსანდრ გუსევი ამბობს, რომ საჰაერო თავდაცვის ერთეულებმა გაანადგურეს უკრაინის 15-ზე მეტი დრონი. მსხვერპლის შესახებ ინფორმაცია არ არის.უკრაინაში, ქალაქ ნიკოპოლში 70 წლის ქალი ემსხვერპლა საარტილერიო ცეცხლს - ამბობს ადგილობრივი სამხედრო ადმინისტრატორი სერჰი ლისაკი.ჩერნიგოვში რუსეთის დრონები მოხვდა ხუთსართულიან სახლს, განადგურდა ზედა ორი სართული. მსხვერპლის შესახებ ინფორმაცია ჯერ არ ვრცელდება, ადგილობრივი ხელისუფლების ინფორმაციით, ადგილზე მუშაობენ მაშველები.უკრაინის მედიაში ასევე გავრცელდა ცნობები აფეთქებებზე კიევთან ახლოს. მანამდე ხელისუფლებამ გაავრცელა გაფრთხილება რეგიონში დრონებით შესაძლო შეტევის შესახებ. ასევე ნახეთ უპილოტო საფრენი აპარატებით თავდასხმას ქალაქ იზიუმში მსხვერპლი მოჰყვა ...