სირიის მოქმედი ხელისუფლება აცხადებს, რომ დასრულებულია საომარი ოპერაცია დამხობილი პრეზიდენტის, ბაშარ ასადის მომხრეთა წინააღმდეგ - იუწყება სააგენტო Reuters-ი. მანამდე სირიის ხელისუფლებას წარედგინა დასავლეთის მოთხოვნა იმ პირთა პასუხისმგებლობის დაყენებაზე, რომლებსაც კავშირი აქვთ ალავიტების მასობრივ მკვლელობებთან - უმცირესობის, რომელსაც ასადი ეკუთვნის. ლონდონში განთავსებული სირიის ადამიანის უფლებების სადამკვირვებლო ცენტრის მონაცემებით, 9 მარტისთვის დაღუპული იყო ათასამდე მშვიდობიანი მოქალაქე, ასადთან დაკავშირებული შეიარაღებული ფორმირებების 250-ზე მეტი მებრძოლი და ახალი რეჟიმის უსაფრთხოების ძალების 230-ზე მეტი თანამშრომელი. სირიის თავდაცვის სამინისტრო აცხადებს, რომ სპეციალურმა სამსახურებმა ლატაკიისა და ტარტუსის პროვინციებში გაანადგურეს ასადის რეჟიმისგან დარჩენილი ძალები. სირიის მოქმედმა მეთაურმა და აშშ-ში, ევროკავშირში, რუსეთში და სხვა ქვეყნებში ტერორისტულ ორგანიზაციად გამოცხადებული ჯგუფის, "ჰაიათ თაჰრირ აშ-შამის" ლიდერმა, აჰმედ აშ-შარამ Reuters-სთან ინტერვიუში მკვლელობებში ასადის მომხრეები და უცხო სახელმწიფო დაადანაშაულა. აშ-შარამ მომხდარს უწოდა საფრთხე ქვეყნის ერთიანობისთვის და განაცხადა, რომ დამნაშავეები დაისჯებიან, მისი მოკავშირეების ჩათვლით. სირიის მოქმედმა მეთაურმა აშშ-ს კიდევ ერთხელ მოუწოდა დამასკისთვის ასადის პირობებში დაკისრებული სანქციების მოხსნისკენ. აშ-შარას თქმით, შეზღუდვების პირობებში ქვეყანა ვერ უზრუნველყოფს საკუთარ უსაფრთხოებას. ამასთან, სირიის ლიდერმა დაადასტურა, რომ მოსკოვთან მოლაპარაკებებს აწარმოებს ახალ პირობებზე სირიაში რუსეთის სამხედრო-საზღვაო ბაზის და ავიაბაზის განთავსების შესახებ. აშ-შარამ ასევე თქვა, რომ აპირებს მოაგვაროს უთანხმოება სირიელ ქურთებთან, რომლებიც სამოქალაქო ომის დროს გამოდიოდნენ ასადის რეჟიმის წინააღმდეგ, იბრძოდნენ საერთაშორისო კოალიციის მხარეს. შემდეგ, 10 მარტსვე ცნობილი გახდა, რომ "სირიის დემოკრატიული ძალების" მეთაურმა, მაზლუმ აბდიმ და ალ-შარამ ხელი მოაწერეს შეთანხმებას, რომელიც ითვალისწინებს ქურთთა ფორმირებების ინტეგრაციას სირიის სამხედრო და სამოქალაქო ინსტიტუტებში. ბაშარ ასადის რეჟიმი დაემხო გასული წლის დეკემბერში, ამის შედეგად ხელისუფლებაში მოვიდა დაჯგუფება "ჰაიათ თაჰრირ აშ-შამი". ასადი ოჯახთან ერთად რუსეთში წავიდა, სადაც მას თავშესაფარი მიანიჭეს. ასევე ნახეთ რა ხდება სირიაში? - სამოქალაქო ომის დასრულების მიუხედავად, ვითარება ისევ დაიძაბა ...