რუსეთის სამართალდამცველი ორგანოები განიცდიან სმარტფონებსა და სხვა ელექტრონულ მოწყობილობებში შესაღწევი ტექნიკის დეფიციტს, - იუწყება რუსეთის გამოცემა RBC (РБК), ვითარებაში გათვიცნობიერებულ რამდენიმე წყაროზე დაყრდნობით. საგანგებო აღჭურვილობა საჭიროა საგამოძიებო მოქმედებებში ეჭვმიტანილთა ელექტრონული მოწყობილობებიდან ინფორმაციის გამოტანისთვის. გამოცემის ინფორმაციით, პრობლემები დაიწყო 2022 წელს, როცა მოსკოვის მხრიდან უკრაინაში შეჭრის გამო რუსეთის ბაზარი დატოვა ბევრმა უცხოურმა კომპანიამ, ხოლო ევროკავშირმა, აშშ-მა და სხვა ქვეყნებმა რუსეთს ეკონომიკური სანქციები დააკისრეს. მაშინ რუსეთის ძალოვანი სტრუქტურებისთვის სპეციალური აღჭურვილობის მიწოდება შეწყვიტეს აშშ-ის, შვეიცარიისა და ისრაელის კომპანიებმა. ბაზარი დატოვა ასევე საერთაშორისო კომპანია BelkaSoft-მა, მისი ხელმძღვანელი, იური გუბანოვი რუსეთიდან წავიდა. რუსეთის პოლიციისა და ეფესბეს განკარგულებაში რჩება ეროვნული წარმოების "მობილური კრიმინალისტი", ჩინეთის MagiCube-ი და რუსეთის კომპანია Elcomsoft-ის წარმოების პროდუქტები. კრიმინალისტების თქმით, ამ აღჭურვილობათა შესაძლებლობები უფრო დაბალია, ვიდრე მათი ამერიკული და ევროპული კონკურენტების. მობილური მოწყობილობებიდან ინფორმაციის გამოტანა ხდება გამოძიების მიმდინარეობისას. ეს შესაძლებელს ხდის არა მხოლოდ მიმოწერის ნახვას და ზარების კონტროლს, არამედ მოცემულ მომენტში პირის ადგილმდებარეობისა თუ კონკრეტულ რაიონში რამდენიმე ეჭვმიტანილს შორის კავშირის დადგენასაც. ასევე ნახეთ თბილისის მერიამ 121 ვიდეო-სამეთვალყურეო კამერა იყიდა ...