რუსეთის ჯარებმა უკრაინაზე უპილოტო საფრენი აპარატებით მორიგი შეტევა მიიტანეს. დაზიანებულია სახლები და სხვა შენობები. უკრაინის საჰაერო ძალების სარდლობის მიერ დღეს, 10 მარტს გამოქვეყნებული მონაცემებით, გასული ღამის განმავლობაში რუსეთმა გამოიყენა სხვადასხვა ტიპის 176 დრონი. სარდლობის თანახმად, საჰაერო და თავდაცვის ძალების ქვედანაყოფებმა 130 ე.წ. დამრტყმელი უპილოტო საფრენი აპარატი ჩამოაგდეს ხარკოვის, კიევის, პოლტავის, სუმის, კიროვოგრადის, ჩერნიგოვის, ჩერკასის, დნეპროპეტროვსკის, ჟიტომირის, ზაპოროჟიეს, ვინიცის, დონეცკის, ოდესის, ნიკოლაევისა და ხერსონის ოლქებში, ხოლო 42 „უპილოტო-იმიტატორი ლოკალურად დაიკარგა ნეგატიური შედეგების გარეშე“. ასევე ნახეთ რუსეთში ისევ დრონებით შეუტიეს „როსნეფტის“ ქარხანას უკრაინის საჰაერო ძალების ცნობით, რუსეთის შეტევის შედეგად დაზარალდნენ ხარკოვის, პოლტავის და კიევის ოლქები. ადგილობრივი ხელისუფლების ცნობით, კიევის ოლქში დრონების ნამსხვრევებმა კერძო სახლი დააზიანა. ხარკოვის ოლქში ხანძარი გაუჩნდა აგროსაწარმოს და დაზიანდა ადმინისტრაციული შენობა. პოლტავის ოლქში დაზიანებულია სამი სახლი და სასოფლო-სამეურნეო ტექნიკა და ავტომობილები. ინფორმაცია დაშავებულების შესახებ არ გავრცელებულა. ...