გერმანიაში მცხოვრები აზერბაიჯანელი ჟურნალისტი აფგან მუხთარლი, ბერლინში გამართულ სარვამარტო აქციაზე, სადაც პატიმრობაში მყოფი ქალი ჟურნალისტების გათავისუფლება მოითხოვეს, მზია ამაღლობელის პლაკატით მივიდა. „ვულოცავ ყველა ქალს, ვინც თავისი და შვილების უფლებებს იცავს და ვინც არ არის გულგრილი ჩვენი ქვეყნის მომავლის მიმართ დღეს. მოვითხოვ თავისუფლებას ჩვენი 8 გმირი ქალი ჟურნალისტისთვის, რომლებიც უშიშრად და დაუფარავად ამხელენ რეჟიმის უკანონობას", - წერს აფგან მუხთარლი ფეისბუკზე და მზია ამაღლობელის გამოსახულებიან ბანერთან ერთად აქვეყნებს პლაკატს 8 აზერბაიჯანელი ქალი ჟურნალისტის ფოტოებით. три „მოვითხოვოთ თავისუფლება ჩვენი გოგოებისთვის“, - წერს აფგან მუხთარლი. ასევე ნახეთ „ჩემს საქმეს გამოიძიებენ, როცა ივანიშვილის ხელისუფლება შეიცვლება“ - ინტერვიუ აფგან მუხთარლისთან აფგან მუხთარლი, აზერბაიჯანის ხელისუფლებისადმი კრიტიკულად განწყობილი ჟურნალისტი, თბილისიდან 2017 წლის 29 მაისს გაუჩინარდა, 30 მაისს კი ცნობილი გახდა, რომ ის აზერბაიჯანში დააკავეს საზღვრის უკანონოდ გადაკვეთის და ვალუტის კონტრაბანდის ბრალდებით. მას აზერბაიჯანის სასამართლომ 6 წლით თავისუფლების აღკვეთა მიუსაჯა. 2020 წლის მარტში აფგან მუხთარლი აზერბაიჯანის ხელისუფლებამ მოულოდნელად გაათავისუფლა და სპეციალური ავიარეისით გაამგზავრა გერმანიაში, სადაც 2019 წლიდან ცხოვრობენ მისი ცოლი ლეილა მუსტაფაევა და შვილი. გერმანიამ მუხთარლის ოჯახს პოლიტიკური თავშესაფარი მისცა. ...