უკრაინის პრეზიდენტმა, ვოლოდიმირ ზელენსკიმ უკრაინაზე მორიგი მასირებული თავდასხმის შემდეგ რუსეთს ბრალად დასდო, რომ მოსკოვს არ აქვს მშვიდობის ინტერესი. „დღევანდელი თავდასხმა ენერგეტიკულ ობიექტებზე და სამოქალაქო ობიექტებზე რუსეთისთვის იყო როგორც არასდროს რუტინული, როგორც არასდროს - მზაკვრული და ცინიკური, თითქოს არც ყოფილიყო უკრაინის და მთელი მსოფლიოს მხრიდან ამ ომის შეწყვეტის მცდელობა“, - თქვა ზელენსკის 7 მარტს, ყოველდღიურ მიმართვაში. უკრაინა პირიქით, მშვიდობის სასწრაფოდ დამყარებითაა დაინტერესებული, თქვა მან და აღნიშნა, რომ „რუსეთის ყოველდღიური ახალი თავდასხმა და რეალობა ამტკიცებს, რომ რუსეთს მშვიდობა უნდა ვაიძულოთ“. უმაღლესი სარდლობის სხდომაზე მან თქვა, რომ გულდასმით იქნა გაანალიზებული უკრაინის ანტისაჰაერო თავდაცვის მუშაობა. უფრო ადრე, 7 მარტს უკრაინის სამხედრო საჰაერო ძალები იტყობინებოდა, რომ რუსეთმა გამოიყენა 194 დრონი და 67 რაკეტა კომბინირებული თავდასხმისთვის, რომლის დროსაც მათი ნახევარზე მეტი ჩამოაგდეს. კიდევ მესამედმა ვერ მიაღწია მიზანს და ვერ მიაყენა ზიანი. რუსეთის განცხადებით, თავდასხმა მიმართული იყო უკრაინის გაზის ინფრასტრუქტურის წინააღმდეგ. უკრაინის სახელმწიფო სანავთობო კომპანიამ, „ნეფტოგაზმა“ განაცხადა, რომ დაზიანდა ბუნებრივი აირის საწარმოები. უკრაინა სამი წელია იბრძვის რუსეთის წინააღმდეგ დასავლეთის დახმარებით. აშშ-ის მიერ სამხედრო დახმარების შეწყვეტა, რისი განკარგულება აშშ-ის პრეზიდენტმა, დონალდ ტრამპმა გასცა, ემუქრება უკრაინის ანტისაჰაერო თავდაცვის მომარაგებას. ტრამპმა ზელენსკი დაადანაშაულა მშვიდობისთვის არასაკმარის ძალისხმევაში. ...