იტალიის პრემიერ-მინისტრმა ჯორჯა მელონიმ ნატოს შესთავაზა, რომ ალიანსში გაწევრიანების გარეშეც გააფართოოს უკრაინაზე კოლექტიური თავდაცვა. საუბარია ნატოს წესდების მეხუთე მუხლზე, რომლის მიხედვითაც ალიანსის ერთ ქვეყანაზე თავდასხმა ითვლება ყველა წევრზე თავდასხმად და, შესაბამისად, კოლექტიურ თავდაცვას ითვალისწინებს. "ეს არ არის იგივე, რაც ნატოში გაწევრიანება, მაგრამ საუბარია უკრაინაზე უსაფრთხოების ისეთივე ქოლგის გავრცელებაზე, რაც ნატოს ქვეყნებს აქვთ. ეს უზრუნველყოფდა უსაფრთხოების სტაბილურ, გრძელვადიან და რეალურ გარანტიებს – უფრო მეტს, ვიდრე ზოგიერთი ის წინადადება, რომელსაც ახლა ვხედავ", - თქვა მელონიმ ევროპისა და უკრაინის თავდაცვის საკითხებისადმი მიძღვნილ ევროკავშირის სამიტის ფარგლებში, რომელიც გუშინ, 6 მარტს, ბრიუსელში გაიმართა. რადიო თავისუფლების რუსული სამსახურის ცნობით, ჯორჯა მელონის ციტატა RBC-უკრაინამ გაავრცელა. მელონიმ დასძინა, რომ წინადადება განიხილება და ჯერჯერობით არ არის დადგენილი კონკრეტული ვადები. "მაგრამ ვხედავ ამ იდეისადმი არსებით ინტერესს თანამოსაუბრეების მხრიდან", - აღნიშნა იტალიის პრემიერ-მინისტრმა, რომელიც დარწმუნებულია, რომ საჭიროა უფრო გრძელვადიანი გადაწყვეტა, ვიდრე უკრაინაში ევროპელი მშვიდობისდამცველების გაგზავნაა. 6 მარტს ბრიუსელში გამართულ სამიტში უკრაინის პრეზიდენტი ვოლოდიმირ ზელენსკიც მონაწილეობდა. „საჰაერო თავდაცვა, იარაღი და საბრძოლო მასალა უკრაინისთვის, დროული მომარაგება, უკრაინის თავდაცვის ინდუსტრიის გაძლიერება, მოლაპარაკებები უკრაინის ევროკავშირში გაწევრიანების შესახებ, რუსეთზე სანქციების ზეწოლის გაზრდის აუცილებლობა და სანქციების გვერდის ავლის წინააღმდეგ ბრძოლა, - ეს ყველაფერი დღეს ჩვენს თემებს შორის იყო“, - განაცხადა ვოლოდიმირ ზელენსკიმ სამიტის დასრულების შემდეგ. ურზულა ფონ დერ ლაიენმა, თავის მხრივ, ყურადღება შეაჩერა „გარდატეხის მომენტზე“ ევროპისთვის. „ევროპა მკაფიო და რეალური საფრთხის წინაშე დგას და, შესაბამისად, უნდა შეძლოს თავის დაცვა, ისევე, როგორც სურს, რომ უკრაინას შეეძლოს საკუთარი თავის დაცვა და მუდმივი და სამართლიანი მშვიდობის ძიება“, - აღნიშნა მან. ასევე ნახეთ ევროკავშირის სამიტზე საუბარი იყო როგორც უკრაინის შეიარაღებაზე, ისე ევროკავშირში გაწევრიანებაზე - ზელენსკი რუსეთი გადაჭრით ეწინააღმდეგება უკრაინაში ევროკავშირისა და ნატოს ძალების განლაგებას. ...