რუსეთის ჯარებმა რაკეტებით და უპილოტო საფრენი აპარატებით მასირებული შეტევა მიიტანეს უკრაინის ენერგეტიკის და გაზის ინფრასტრუქტურაზე. ამის შესახებ დღეს, 7 მარტს დილით განაცხადა უკრაინის ენერგეტიკის მინისტრმა გერმან გალუშჩენკომ. მინისტრის ინფორმაციით, უკრაინის სხვადასხვა რეგიონში დაზიანებულია ელექტროენერგიით და გაზით მომარაგების ობიექტები. გალუშჩენკოს კონკრეტული ობიექტები არ დაუსახელებია. მისი განცხადებით, იქ, სადაც შესაძლებელია, მაშველები და ენერგეტიკოსები მუშაობენ შედეგების ლიკვიდაციისთვის. მინისტრის თანახმად, ყველა ზომას მიმართავენ ელექტროენერგიით და გაზით მომარაგების სტაბილიზაციისთვის. განახლება: უკრაინის კომპანია „ნაფტოგაზის“ ინფორმაციით, ომის დაწყების შემდეგ, რუსეთმა კომპანიის ობიექტებზე მიიტანა მე-17 კომბინირებული შეტევა, რომლის შედეგად დაზიანდა გაზის მოპოვებისთვის საჭირო სამრეწველო სიმძლავრეები. კომპანიას კონკრეტული ობიექტები არ დაუსახელებია. უკრაინის ტერნოპოლის ოლქის სამხედრო ადმინისტრაციის მიერ გავრცელებული ცნობით, ერთ-ერთი ობიექტი ამ რეგიონში მდებარეობს. ტერნოპოლში გათბობის და ცხელი წყლის მიწოდება შეიზღუდა. ხარკოვის მერიის ინფორმაციით, დარტყმა იყო ქალაქის კიევის რაიონში მდებარე ინფრასტრუქტურულ ობიექტზე. დაზიანებულია სახლიც. დაშავდა 8 ადამიანი. ასევე ნახეთ ზელენსკიმ დაადასტურა, რომ აშშ-უკრაინის შეხვედრა საუდის არაბეთში გაიმართება უკრაინის საჰაერო ძალების სარდლობის ინფორმაციით, რუსეთმა გამოიყენა სხვადასხვა ტიპის 67 რაკეტა და 194 უპილოტო საფრენი აპარატი, რომელთაგან 34 რაკეტა და 100 ე.წ. დამრტყმელი დრონი ჩამოაგდეს, 10-მდე რაკეტამ სამიზნეებამდე ვერ მიაღწია, 86 უპილოტო-იმიტატორი კი ლოკალურად დაიკარგა ნეგატიური შედეგების გარეშე. სარდლობის ცნობითვე, მოწინააღმდეგის საჰაერო შეტევის მოგერიებაში პირველად მონაწილეობნენ ფრანგული გამანადგურებლები Mirage-2000, რომლებიც უკრაინის არმიამ თებერვალში მიიღო. თავის მხრივ, რუსეთის თავდაცვის სამინისტრომ გამოაქვეყნა ზოგადი, მოკლე განცხადება, რომ შორ მანძილზე მოქმედების საჰაერო, საზღვაო და სახმელეთო ბაზირების მაღალი სიზუსტის იარაღით და დრონებით ჯგუფური დარტყმა მიაყენეს უკრაინის გაზის და ენერგეტიკის ინფრასტრუქტურის ობიექტებს, რომლებიც უზრუნველყოფენ უკრაინის სამხედრო-სამრეწველო კომპლექსის მუშაობას. რუსეთის თავდაცვის სამინისტრო ირწმუნება, რომ დარტყმის მიზანი მიღწეულია. რუსეთმა უკრაინის ენერგოობიექტების განადგურება ქვეყანაში ფართომასშტაბიანი შეჭრიდან მალევე დაიწყო. უკრაინაში შექმნილი ენერგოკრიზისი განსაკუთრებით ზამთრის პერიოდში მწვავდება. უკრაინის ენერგოობიექტების მიზანმიმართულად განადგურების გამო, 2024 წლის მარტში სისხლის სამართლის საერთაშორისო სასამართლომ გასცა რუსეთის შავი ზღვის ფლოტის სარდლის, ადმირალ ვიქტ...