6 მარტს, ონლაინგამოცემების, "ბათუმელებისა" და "ნეტგაზეთის" დამფუძნებლის, მზია ამაღლობელის ადმინისტრაციული საქმის განხილვისას მოსამართლე სალიხ შაინიძემ ღიად დატოვა დაცვის მხარის შუამდგომლობა, აჭარის პოლიციის დეპარტამენტის ხელმძღვანელის, გრიგოლ ბესელიასა და ბათუმის პოლიციის უფროსის, ირაკლი დგებუაძის გამოკითხვის თაობაზე. ისინი უშუალოდ ფიგურირებენ ამაღლობელის ორივე დაკავების საქმეში. როგორც ადვოკატი ნონა ქურდოვანიძე ამბობს, დგებუაძისა და ბესელიას დაკითხვას ითხოვენ იმ მიზეზით, რომ უშუალოდ გრიგოლ ბესელიამ მიიღო გადაწყვეტილება მზია ამაღლობელის დაკავების შესახებ და თავად განახორციელა, რაც ვიდეომტკიცებულებით დასტურდება. "დაცვის მხარეს აინტერესებს მისი, როგორც მოწმის ჩვენება, რის გამო დააკავა ამაღლობელი. ვიდეომტკიცებულებით ისიც დასტურდება, რომ ირაკლი დგებუაძე აკეთებს კომენტარს ამაღლობელის დაკავებაზე და მიზეზად ადმინისტრაციული სამართალდარღვევის 150-ე მუხლს ასახელებს. თუმცა ამაღლობელს დაკავების შემდეგ ოქმი შეუდგინეს 173-ე მუხლით. მოსამართლემ თქვა, რომ ეს საკითხი ჯერ ბოლომდე გადაწყვეტილი არ არის და ამ საკითხს დაუბრუნდებიან მოგვიანებით. ეს არის ღიად დატოვება საკითხის, - მან თქვა, რომ საქმის განხილვისას მტკიცებულების გამოკვლევის ეტაპზე თუ ჩაითვალა, რომ მათი [დგებუაძისა და ბესელიას] გამოკითხვა მნიშვნელოვანია მოწმედ, შემდეგ დაუბრუნდება ამ საკითხს", - განაცხადა მან. ადვოკატის თქმითვე, საქმეში ყველაზე მნიშვნელოვანი მტკიცებულებაა 4 ვიდეოჩანაწერი. "ერთ ვიდეომტკიცებულებაში ასახულია, რომ მზია ამაღლობელი სტიკერის გაკვრის შემდეგ დააკავეს. მეორე ვიდეოჩანაწერში ირაკლი დგებუაძე აკეთებს კომენტარს, რომ ამაღლობელი დააკავეს 150-ე მუხლით. მესამე ვიდეომტკიცებულება საგამოძიებო ფილმია, რომელიც მოამზადა სტუდია "მონიტორმა" და ნაჩვენებია, როგორ გააყალბეს როგორც დაკავების, ასევე სამართალდარღვევათა ოქმი მზიას საქმეში შსს-ს წარმომადგენლებმა. მეოთხე ჩანაწერში არის ვიდეომტკიცებულება, როგორ აგინებს და როგორ აყენებს სიტყვიერ შეურაცხყოფას ირაკლი დგებუაძე მზია ამაღლობელს, უკვე მეორე დაკავების შემდეგ. ეს მტკიცებულება იმის საჩვენებლად გვჭირდება, რომ მთლიანად ბათუმის პოლიციის ეს განყოფილება და დგებუაძე ვერ იქნება მიუკერძოებელი ამ საქმეში, ისინი არიან დაინტერესებული პერსონები", - თქვა ადვოკატმა ქურდოვანიძემ. მოსამართლემ ამაღლობელის ადვოკატების შუამდგომლობა დააკმაყოფილა, რომლებიც მტკიცებულების დაშვებას ითხოვდნენ - 4 ვიდეოფაილისა და 10 მოწმის სახით. ადვოკატ თამარ წულუკიძის განმარტებით, მზია ამაღლობელი 11 იანვარს ღამით თავდაპირველად პოლიციის შენობაზე სტიკერის გაკვრისთვის დააკავეს, რომელიც პოლიციამ მალევე ჩამოხსნა. "როცა მოქალაქეებმა იკითხეს, ირაკლი ...