პანამის არხის ორივე მხარეს მდებარე ძირითადი პორტების მმართველი ჰოლდინგი, ჰონგ-კონგის Hutchison-ი 90%-იან წილს 19 მილიარდ დოლარად მიჰყიდის ამერიკულ კონსორციუმს, რომელსაც საინვესტიციო კომპანია BlackRock-ი ხელმძღვანელობს. პორტების მმართველმა გადაწყვეტილება 4 მარტს გამოაცხადა. პრეზიდენტმა დონალდ ტრამპმა ბოლო ხანს არაერთხელ განაცხადა, რომ შეერთებულმა შტატებმა პანამის არხზე კონტროლი უნდა დაიბრუნოს. სააგენტო AFP-ს მოჰყავს Hutchison-ის ერთ-ერთი ხელმძღვანელის, ფრენკ სიქსტის სიტყვები, რომ ამერიკულ მხარესთან გარიგება მხოლოდ კომერციული ხასიათისაა და პოლიტიკასთან კავშირი არ აქვს. პანამის ხელისუფლებამ განაცხადა, რომ შეთანხმება კერძო კომპანიებს შორის შედგა და მასთან არანაირი კავშირი არ აქვს. ჰოლდინგ Hutchison-ის შვილობილი კომპანია Panama Ports Company წლებია მართავს პორტ კრისტობალს, რომელიც ატლანტის ოკეანის მხარეს მდებარეობს და ბალბოას, რომელიც წყნარი ოკეანის მხარესაა. 2021 წელს კომპანიასთან შეთანხმება 25 წლით გაგრძელდა. ასევე ნახეთ ტრამპს პანამის არხზე შეერთებული შტატების კონტროლის აღდგენა სურს აშშ-ის პრეზიდენტმა დონალდ ტრამპმა ჯერ კიდევ ინაუგურაციამდე, 2024 წლის დეკემბერში, უკმაყოფილება გამოთქვა პანამის არხით ამერიკული გემების მიმოსვლის მაღალი ტარიფების გამო, რასაც „უსამართლო“ უწოდა და განაცხადა, რომ „ქვეყნის სრული ძარცვა დაუყოვნებლივ შეწყდება“. ტრამპის თანახმად, ამერიკის შეერთებულმა შტატებმა, რომელიც პანამის არხის უმსხვილესი მომხმარებელია, 110 წლის წინ გახსნილი არხის მშენებლობისთვის დიდი ადამიანური მსხვერპლი და დიდი თანხა გაიღო, პრეზიდენტმა კარტერმა კი „სისულელე“ ჩაიდინა და არხი პანამას „ერთ დოლარად მისცა“. დონალდ ტრამპის განცხადებით, არხი უნდა ემართა პანამას და არა ჩინეთს ან ვინმე სხვას, ამიტომ არ დაუშვებენ, რომ იგი უცხო ხელში აღმოჩნდეს. პასუხად პანამის პრეზიდენტმა ხოსე რაულ მულინომ განაცხადა, რომ არხის თითოეული კვადრატული მეტრი და მისი მიმდებარე ტერიტორია პანამას ეკუთვნის და ქვეყნის საკუთრებად დარჩება, ტარიფები კი დადგენილია საბაზრო პირობების და არხის მომსახურებისთვის საჭირო ხარჯების მიხედვით. პანამის პრეზიდენტის თანახმად, არხს არც პირდაპირ და არც ირიბად არ აკონტროლებს არც ჩინეთი, არც ევროკავშირი, არც აშშ და არც სხვა რომელიმე ქვეყანა და პანამის სუვერენიტეტი და დამოუკიდებლობა განხილვის საგანი ვერ იქნება. ასევე ნახეთ პანამამ უარყო, რომ ამერიკული სახელმწიფო გემები პანამის არხით უფასოდ ისარგებლებენ 2025 წლის 2 თებერვალს პანამაში ჩავიდა აშშ-ის სახელმწიფო მდივანი მარკო რუბიო, რომელმაც პრეზიდენტ ხოსე რაულ მულინოსთან მოლაპარაკებისას უკმაყოფილება გამოთქვა პანამის არხზე ჩინეთის გავლენის გამო. 3 თებერვალს პრეზიდენტმა მულინომ განაცხადა, რო...