რუსეთის ხელისუფლება დათანხმდა, შეერთებულ შტატებსა და ირანს შორის შუამავლის როლი ითამაშოს მთელ რიგ საკითხებში, მათ შორის ირანის ბირთვულ პროგრამასა და ახლო აღმოსავლეთში შეერთებული შტატებისადმი მტრული დაჯგუფებების მხარდაჭერასთან დაკავშირებით. ამის შესახებ სამშაბათს იტყობინება Bloomberg-ი დაუსახელებელ წყაროებზე დაყრდნობით, რომლებიც ამბობენ, რომ „იცნობენ სიტუაციას“. სააგენტოს ცნობით, რუსეთის მიერ შუამავლობის გაწევისადმი დაინტერესება თავად აშშ-ის პრეზიდენტმა დონალდ ტრამპმა გამოხატა 12 თებერვალს რუსეთის პრეზიდენტ ვლადიმირ პუტინთან სატელეფონო საუბრისას. ეს თემა შემდგომში საუდის არაბეთში ორი ქვეყნის საგარეო საქმეთა სამინისტროების ხელმძღვანელების შეხვედრაზე განიხილეს. ამის შესახებ ოფიციალური განცხადება არ ყოფილა, შეხვედრის მთავარ საკითხებად დაასახელეს ომი უკრაინაში და აშშ-რუსეთის ორმხრივი ურთიერთობები. Bloomberg-ის ცნობით, პუტინი დათანხმდა ტრამპის წინადადებას შუამავლის როლის შესრულებაზე, მაგრამ სტატიაში არ არის ნათქვამი, რა სახის შუამავლობა იქნება ეს. კითხვაზე, იყო თუ არა რუსეთის მხრიდან შეთავაზება, რომ ის თეირანსა და ვაშინგტონს შორის შუამავლის როლს ითამაშებს, ირანის საგარეო საქმეთა სამინისტროს წარმომადგენელმა თქვა, რომ „ბუნებრივია“ ქვეყნებისთვის დახმარების შეთავაზება. კრემლის პრესსპიკერმა დმიტრი პესკოვმა, თავის მხრივ, განაცხადა, რომ „აშშ-მა და ირანმა ყველა პრობლემა მოლაპარაკებების გზით უნდა გადაწყვიტონ“ და რომ მოსკოვი „მზადაა, ყველაფერი გააკეთოს ამის მისაღწევად“. თეთრ სახლს ჯერ არ გაუკეთებია კომენტარი ამ პუბლიკაციაზე. ასევე ნახეთ დონალდ ტრამპი: „შეშინებული“ ირანი მზად არის ბირთვული შეთანხმებისთვის 2017-2021 წლებში, თავისი პრეზიდენტობის პირველი ვადის დროს, ტრამპმა აშშ გაიყვანა ირანის ბირთვული შეთანხმებიდან. მან ასევე მოიწონა ოპერაცია, რომლის შედეგადაც მოკლულ იქნა ისლამური რევოლუციის გუშაგთა კორპუსის გენერალი ყასემ სოლეიმანი, რამაც კიდევ უფრო დაძაბა ვაშინგტონსა და თეირანს შორის ურთიერთობები. მეორე ვადით არჩევის შემდეგ ტრამპმა განაცხადა, რომ მზად არის ირანთან შეთანხმებისთვის. ამასთან მის პირობად დაასახელა თეირანის ვალდებულებები, უარი თქვას ბირთვული იარაღის მოპოვებაზე. „მე მსურს კარგი გარიგების მიღწევა, გარიგებისა, რომლითაც შეძლებთ იცხოვროთ და თქვენთან ყველაფერი კარგად იქნება,“ მიმართა ტრამპმა ირანელებს. ამასთან, აშშ-ის პრეზიდენტმა ხელი მოაწერა ბრძანებას ირანზე მაქსიმალური ზეწოლის კამპანიის აღდგენის შესახებ, რათა ცხადყოს აშშ-ის ზრახვების სერიოზულობა. რუსეთმა, თავის მხრივ, ცოტა ხნის წინ ხელი მოაწერა ირანთან სტრატეგიული პარტნიორობის შეთანხმებას. ოღონდ ის, ჩრდილოეთ კორეასთან შეთანხმებისგან განსხვავებით, არ შეიცავს პუნქტს სამხედრო ალიანსის შესახებ. ირან...