ამერიკის შეერთებული შტატების მიერ უკრაინისთვის სამხედრო დახმარების შეჩერების მიუხედავად, დიდი ბრიტანეთის მთავრობა განაგრძობს მცდელობას პრეზიდენტების, დონალდ ტრამპის და ვოლოდიმირ ზელენსკის „შესარიგებლად“. ამის შესახებ დღეს, 4 მარტს BBC იუწყება დიდი ბრიტანეთის მთავრობის მაღალჩინოსნებზე დაყრდნობით. ბრიტანული მაუწყებლის წყაროთა თანახმად, ლონდონი განაგრძობს ინტენსიურ მცდელობებს, რათა შეერთებული შტატების და უკრაინის პრეზიდენტებს შორის დიალოგი აღდგეს და რუსეთთან მოლაპარაკებების დაწყების შემთხვევაში უკრაინა უზრუნველყოფილი იყოს მაქსიმალურად ძლიერი პოზიციებით. ასევე ნახეთ ტრამპმა შეაჩერა უკრაინის სამხედრო დახმარება 3 მარტს ცნობილი გახდა, რომ პრეზიდენტ დონალდ ტრამპის გადაწყვეტილებით, ამერიკის შეერთებულმა შტატებმა უკრაინის სამხედრო დახმარება შეაჩერა. რუსეთთან ომში მყოფი უკრაინა ყველაზე დიდ სამხედრო დახმარებას შეერთებული შტატებისგან იღებდა. რამდენიმე დღით ადრე, 28 თებერვალს ვაშინგტონში ჩაიშალა აშშ-ის და უკრაინის პრეზიდენტების მოლაპარაკება და ეკონომიკური თანამშრომლობის შეთანხმების ხელმოწერა. თეთრ სახლში მოლაპარაკების დაწყების წინ, პრესისთვის საჯარო შეხვედრისას სიტყვიერი დაპირისპირება მოხდა, ერთი მხრივ, პრეზიდენტ ზელენსკის და, მეორე მხრივ, პრეზიდენტ ტრამპს და ვიცე-პრეზიდენტ ვენსს შორის. ამ კონფლიქტის შემდეგ უკრაინის პრეზიდენტმა თეთრი სახლი დატოვა. ასევე ნახეთ შეძლებს ევროპა უკრაინის დაცვას? - ლონდონის სამიტის შედეგები ...