რუსეთის დასავლეთის მეორე საოლქო სამხედრო სასამართლომ 22 და 26 წლით პატიმრობა მიუსაჯა უკრაინელ მფრინავებს, ალექსანდრ მოროზოვს და დმიტრი შიმანსკის, შესაბამისად - რუსეთში უკანონო შეღწევისა და ტერორისტული აქტის მომზადების ბრალდებებით. შიმანსკი ხუთი წლის განმავლობაში იქნება ციხეში, მოროზოვი - ოთხი, ამის შემდეგ ორივე მსჯავრდადებულს გადაიყვანენ მკაცრი რეჟიმის კოლონიაში. ბრალდების მხარე ორივე განსასჯელისთვის 30 წლით ითხოვდა პატიმრობას. სააგენტო TASS-ის თანახმად, შიმანსკის სისხლის სამართლის კოდექსის შვიდი მუხლით ჰქონდა წაყენებული ბრალდებები, მოროზოვს - 10 მუხლით, მათ შორის ტერორიზმის, საერთაშორისო ფრენების წესების დარღვევისა და საზღვრის უკანონო გადაკვეთის მუხლებით. ეფესბე იუწყება, რომ პილოტები დააკავეს 2023 წლის აპრილში, მას შემდეგ, რაც ჭურვები იქნა ჩამოგდებული ბრიანსკის ოლქში, კომბინატზე "სლავა". დაშავებულები არ იყვნენ. ეფესბეს მიერ გამოქვეყნებულ ვიდეოჩანაწერში შიმანსკი აღიარებს, რომ ასრულებდა უკრაინის დაზვერვის დავალებას, მოროზოვი კი იუწყება, რომ დაბომბვას გეგმავდა, მაგრამ იძულებული გახდა თვითმფრინავი დაესვა. რა პირობებშია ვიდეოჩანაწერი გაკეთებული, დაზუსტებული არ არის. გამოძიება ასევე აცხადებს, რომ სამხედროები გეგმავდნენ ე.წ. ბინძური ბომბის გამოყენებას - მასობრივი განადგურების იარაღის, რომელიც რადიოაქტიურ ნივთიერებას შეიცავს. უკრაინა უარყოფს "ბინძური ბომბების" ფლობას. ამგვარი საბრძოლო მასალების მის არსენალში არსებობაზე ცნობები არ არის. სასამართლოზე მოროზოვმა და შიმანსკიმ ბრალი აღიარეს "წაყენებული ბრალდებების მხოლოდ მცირე ნაწილში", ხოლო მანამდე მიცემული ჩვენებები უარყვეს, - იუწყება TASS-ი. ასევე ნახეთ უკრაინა ადასტურებს, რომ 1 მარტს დნეპროპეტროვსკის ოლქში რუსეთის ძალებმა მის პოლიგონზე მიიტანეს დარტყმა, არის მსხვერპლი ...