თუკი რუსეთსა და უკრაინას შორის მიღწეული იქნება ზავი, რომელიც გავრცელდება საბრძოლო მოქმედებებზე ჰაერში, ზღვაში და ენერგეტიკულ ინფრასტრუქტურაზე შეტევებზე, მან შეიძლება უკრაინას და მის მოკავშირეებს საშუალება მისცეს, გაიგონ, კეთილსინდისიერად მოქმედებს თუ არა რუსეთის პრეზიდენტი ვლადიმირ პუტინი და მზად არის თუ არა, დაიწყოს სერიოზული მოლაპარაკებები სამშვიდობო შეთანხმებაზე, განაცხადა ორშაბათს საფრანგეთის საგარეო საქმეთა მინისტრმა ჟან-ნოელ ბარომ რადიო RTL-ის ეთერში. მანამდე საფრანგეთის პრეზიდენტმა ემანუელ მაკრონმა თქვა, რომ საფრანგეთი და დიდი ბრიტანეთი გამოდიან ერთი თვით ნაწილობრივი ცეცხლის შეწყვეტის შესახებ წინადადებით, რაც არ შეეხება საბრძოლო მოქმედებებს ფრონტზე, იტყობინება Reuters-ი. ასევე ნახეთ მაკრონის და სტარმერის წინადადებაა უკრაინასა და რუსეთს შორის პირველ ეტაპზე ერთთვიანი ზავი საფრანგეთის საგარეო საქმეთა მინისტრის თქმით, მისი აზრით, უკრაინისა და შეერთებული შტატების პრეზიდენტები, ვოლოდიმირ ზელენსკი და დონალდ ტრამპი, შეიძლება მზად იყვნენ მოლაპარაკებების განსაახლებლად მას შემდეგ, რაც მათ შორის პარასკევს თეთრ სახლში მწვავე შელაპარაკება მოხდა. გაზეთ Le Figaro-სთვის მიცემულ ინტერვიუში მაკრონმა თქვა, რომ ის და დიდი ბრიტანეთის პრემიერ-მინისტრი კირ სტარმერი კვირას ლონდონში, ევროკავშირის ლიდერების სამიტზე, გამოვიდნენ რუსეთსა და უკრაინას შორის საზავო შეთანხმების წინადადებით. ...