განახლება: სახელმწიფო უსაფრთხოების სამსახურის ცნობით, თბილისის აეროპორტში "უსაფრთხოების პროტოკოლით გათვალისწინებული ღონისძიება" დასრულებულია. თბილისის საერთაშორისო აეროპორტის მუშაობა ჩვეულ რეჟიმში აღდგა. 28 თებერვალს, საღამოს შინაგან საქმეთა სამინისტროს თანამშრომლებმა თბილისის საერთაშორისო აეროპორტის შენობაში მყოფ მგზავრებს შიდა სივრცე დაატოვებინეს. არსებული ინფორმაციით, ადგილზე ევაკუაცია გამოცხადდა. ერთ-ერთი მგზავრი რადიო თავისუფლებას ეუბნება, რომ ევაკუაციის შესახებ აეროპორტის ტერიტორიაზე ხმოვანი შეტყობინებით გამოაცხადეს, თანამშრომლებმა კი მგზავრები გარეთ გაიყვანეს. ამ ეტაპზე, უცნობია ევაკუაციის მიზეზი. ამ კითხვით და კიდევ მეტი დეტალის გასაგებად რადიო თავისუფლება შინაგან საქმეთა სამინისტროსა და სახელმწიფო უსაფრთხოების სამსახურს დაუკავშირდა. სუს-ში განაცხადეს, რომ თბილისის საერთაშორისო აეროპორტში სახელმწიფო უსაფრთხოების სამსახური "უსაფრთხოების პროტოკოლით გათვალისწინებულ ღონისძიებებს" ახორციელებს. ...